Комендант Роман

    Кітап тағдыры да адам тағдырына ұқсайды. Оның да шаңға шығып шарықтайтын да, омақаса құлап, қансырап қалатын да кезеңдері болады. Ұсынылып отырылған екі кітаптан тұратын роман кезінде тағдырдың келеңсіз көрінісіне ұшыраған. Біріншісі алғаш рет 1961 жылы «Ажал құрсауында» деген атпен шығып, бұрынғы әскери жарғының «Қызыл Армия жауынгері жау қолына тірідей түспейді» деген қағидасына сай келмегеннен кейін, оның қайтып жарық көруіне тыйым салынған. Екіншісі 1963 жылы «Бетпе-бет» деген атпен жарық көріп, магазиндерге түскен жерінен «КГБ қызметі дұрыс көрсетілмеген» деген айыппен «ұсталып», өртелген. Фашизмге қарсы жүргізілген Ұлы Отан соғысы жеңісінің 50 жылдығы тұсында жазықсыз жапа шеккен екі кітапты «Комендант» деген ортақ атпен оқырманға қайта ұсынуды жөн көрдік.